ELA, LAB, STEE-EILAS, EHNE eta HIRU sindikatuek kontzentrazioak deitu dituzte biharko Hego Euskal Herriko lau hiriburuetan, Epaiketa politikorik ez. Eskubide guztiak guztiontzat lelopean.
Kontzentrazioak 12:00etatik 12:30era izango dira. Sindikatuek, gaur goizean bidalitako ohar baten bidez, exijitu dute Bateragune auziko akusatu guztien "berehalako eta baldintzarik gabeko" askatasuna, eta eskatu dute "ideia politikoen aurkako prozesu guztiak" amaitzeko.
Sindikatuen ustez, "Madrilen ematen ari den epaiketak larritasun berezia du eta lekuz kanpo dago, are gehiago auzipetuek gatazka gainditzeko egindako lan politikoaren ondorioz, egungo testuingurura iritsi garenean".
Gizarte osoari, eta bereziki langilegoari dei egin diete epaiketa honen aurrean mobiliza daitezen.