Beste edonor izan zitekeen, baina bera atxilotu zuten. Irailaren 10eko blokeatze egunean parte hartu zuen gazte bat zigortu dute Baionako Auzitegian. Bost hilabeteko kartzela zigorra galdetu du haren kontra fiskaltzak, gibelapenarekin. Azkenean, 1.500 euroko isuna ematea erabaki du epaileak, gibelapenarekin. Gisa bereko zigorrik jaso ezean, ez du sosik ordaindu beharko, beraz.
Egun kalapitatsua izan zen irailaren 10ekoa. Emmanuel Macron Frantziako presidentearen politiken kontra protestara deitua zuten, eta blokeatzeak goizetik goiz hasi nahian ibili ziren herritarrak, Baionan eta Angelun (Lapurdi); baina biziki presente zegoen Polizia, mugimendu txikienari ere bortitz erantzuten. Polizien presentzia nabarmena izan zen Baionan: orotara sei lagun atxilotu zituzten, eta beste hamar bat pertsona gutienez nortasun kontrolak egiteko eraman zituzten.
Astelehen honetan auzipetu duten gazteari honako hau leporatu zioten: legez kanpoko manifestazio batean parte hartzea, zirkulazioa trabatzea, aurpegia estaltzea, aztarnak emateari uko egitea eta labana bat soinean eramatea. Manifestazioetan parte hartu izana onartu du gazteak, eta erran du «bere bizi pribatua babesteko» eraman zuela maskara kirurgiko bat soinean, ez zuelako «sare sozialetako eta hedabideetako argazkietan agertu nahi». Labana, berriz, eguerdiko bazkarirako zeraman: «Jakizu debekatua zela jakin izan banu, ogitartekoa etxean eginik etorriko nintzela», adierazi dio epaileari, haren irribarrea eraginez.
Manifestazio eskubidea defendatu du defentsako abokatuak. «Ez da inolako bortizkeriarik, ez arma erabilpenik; ez zaie poliziei oldartu, ez ditu iraindu; ez dago horrelako ezer». Bisaia kukutzearen hautua ere defendatu du. «Biziki diskretuki kukutua zen. Ez zeraman kaputxarik, ez zen bortizkeriak egitera edo ezer haustera etorria». Argudioak argudio, gazteari leporatzen zaizkionak legez debekatuak direla erran dute fiskaltzak eta epaileak. Horrela azaldu dute zigorra.
