Herenegun gauean pertsona bat harrapatu zuten A-64 autobidean, Samatzeko (Nafarroa Beherea) ordainlekuaren heinean: gidari batek, jendarme bati obeditzea errefusatu ondotik, autoarekin hura jo zuen, eta lurrera erorarazi. Agenteak ospitaleraturik segitzen du, baina ez da gehiago hil ala biziko egoeran. Hainbat hezur ditu hautsiak. Gidariak ihes egin zuen, eta hura bilatzeko lanetan ari direla zehaztu du Sud Ouest egunkariak. Autoan zihoazen lau bidaiariak atxilotu egin zituzten.
Jean-Marie Girier Pirinio Atlantikoko prefetaren arabera, jendarmea «bortizki» joa izan zen. Prentsa ohar bidez jakinarazi du gertakaria «dramatikoa eta larria» izan zela eta fermuki gaitzesten duela. Bertzalde, ihes egin duen gidaria atzemateko baliabide «anitz» erabiltzen ari direla zehaztu du. Besteak beste lehen mailako ikerketak plantan emateko berrogei jendarme eta helikoptero bat mobilizatu dituela erran du.
Baionako Auzitegiak inkesta ireki du obedientzia ukatzeagatik, eta baita hilketa saiakeragatik ere. Prefetak oroitarazi du segurtasun indarretako agente ororen kontrako edozein eraso onartezintzat jotzen duela eta ondorioz erantzun juridiko «fermua» izanen duela kasu honek ere.
