Gipuzkoak berretsi du ez duela mendekotasun arloko mozketarik egingo

Espainiako Gobernuak «hiltzen» utzi nahi du Mendekotasun Legea, Gipuzkoako Foru Aldundiaren esanetan. Hori dela eta, adierazi du ez dituela ezarriko mendekotasunaren inguruko murrizketak. Ander Rodriguez Gizarte Gaietarako diputatuak nabarmendu duenez, «esfortzu ekonomiko handia» egin beharko du aldundiak: «PPk egin dituen mozketen ondorioz, hamar milioi euro gutxiago jasoko ditugu aurten». 230 milioi euro bideratzen ditu aldundiak urtean; horietatik 35 Espainiako Gobernuak ematen zizkion. Aralarrek, bestalde, Arabako, Bizkaiko eta Gipuzkoako erakundeei eskatu die mendekotasunaren inguruan «akordio zabalak» egiteko eta krisi garaian kalitatezko zerbitzu publikoak mantentzen saiatzeko.