Gizon batek 30 urte inguruko emakume bati eraso egin zion atzo iluntzean, Azkainen (Lapurdi). Herriko eskola publikoaren atarian zegoela, 19:00ak aldera, gizonak atzetik heldu eta «bortxatu» egingo zuela egin zion mehatxu. Mediabask hedabideak zehaztu duenez, emakumeak handik igarotzen ari zen auto batera igotzea lortu zuen, eta eskapo egin zuen horrela.
Erasoaren berri izan eta berehala, alerta mezu bat zabaldu zuen herriko mugimendu feministak, besteak beste erasotzailearen irudia deskribatzeko. Horri esker atxilotu zuen handik gutxira Poliziak, herriko plazan, eta Uztaritzeko komisariara eraman zuten.
Erasoa salatu eta gaitzesteko elkarretaratzea egin du Azkaineko mugimendu feministak.
