Ertzaintzak 21 urteko gizon bat atxilotu du gaur goizean Erandion (Bizkaia), bikotekidea trenbidera botatzea egotzita. Eusko Jaurlaritzako Segurtasun Sailaren arabera, Astrabuduko metro geltokian bota du trenbidera, metroa iristear zegoenean.
Metro gidaria garaiz ohartarazi dute, eta geltokira iritsi baino lehen gelditu du metroa, herritarra ez harrapatzeko. Buruan zuen kolpea dela eta, Gurutzetako ospitalera (Barakaldo, Bizkaia) eraman dute.
Segurtasun Sailak jakinarazi du ustezko egileak ihes egin duela. Hala ere, handik gutxira atxilotu du Ertzaintzak. Polizia etxean dagozkion tramiteak egin eta gero, epailearen esku utziko dute.
