Gizon bat atxilotu zuten larunbatean Galdakaon (Bizkaia), sexu askatasunaren kontrako delitu bat egitea egotzita, Eusko Jaurlaritzako Segurtasun Sailak erran duenez.
Larunbatean bertan, emakume batek salaketa jarri zuen; egun berean atxilotu zuten gizona, eta igandean utzi zuten epailearen esku.
Galdakaoko Udalak adierazpen instituzional bat onartu du sexu erasoa «irmo» arbuiatzeko eta biktimari eta haren hurkoei babesa agertzeko. Talde politiko guztiek onetsi dute testua. Halakoetan ohi den bezala, udalak protokoloa aktibatu du biktimari eman beharreko arreta koordinatzeko asmoz.
Udalaren iritziz, gertatutakoa ez da «banakako jokabideen» ondorio; aitzitik, «sakon errotuta» dago emakumeen eta gizonen arteko desberdintasun harremanetan, eta agerian uzten du kolektibo feministarekin, gizarte eragileekin eta, oro har, herritarrekin batera lan egiten jarraitu behar dela berdintasunaren alde.
Horiek horrela, udalak konpromisoa hartu du aurrerantzean ere neurriak ezartzeko biktimek arreta «azkarra, koordinatua eta eraginkorra» izan dezaten, prebentzioa indartu dadin, eta indarkeria matxista amaitu dadin. Era berean, adierazi du bat egingo duela mugimendu feministak sexu erasoa salatzeko antolatutako ekitaldiekin, eta parte hartzeko deia egin die herritarrei. Hain justu, Galdakaoko mugimendu feministak eta emakume taldeek elkarretaratze batera deitu dute biharko, 20:00etan, Santi Brouard plazan.
