19 urteko mutil bat atxilotu zuen atzo Ertzaintzak Gasteizen, 18 urteko neska bati sexu erasoa egitea egotzita. Uztailean izan zen erasoa, eta ertzainek orain atxilotu dute mutila. Ertzaintzaren arabera, beste hainbat lagunekin batera oldartu zitzaion biktimari, goizaldean, hura etxera itzultzen ari zela.
Erasotzaileak «hainbat ukitu» egin zizkion biktimari, eta, neska ihes egiteko ahaleginean ari zen bitartean, sakelakoa eta soinean zeraman dirua lapurtu zizkion. Gero, ihesi joan zen mutila. Ertzaintzak salaketa jaso zuen, eta ikerketa abiatu. Mutila identifikatzea lortu, eta astearte goizean hartu zuten atxilo azkenik, lapurreta eta sexu erasoa leporatuta.
Preso da orain gizona, epailearen aurrean agertzeko zain. Ez da aferan ikerturiko bakarra: 17 urteko adingabe bat ere ikertzen ari da Ertzaintza, «gertaeretan parte hartu zuelakoan». Adingabea ikertzen ari badira ere, Ertzaintzak ez du atxilotu oraindik.
