28 urteko gizon bat espetxeratu dute bikotekide ohiari sexu erasoa egitea egotzita. Ertzaintzak ostegunean atxilotu zuen Gasteizen.
Eusko Jaurlaritzaren Segurtasun Sailak jakinarazi duenez, gertakariak aurreko astean gertatu ziren: gizonak bikotekide ohia hartu zuen Arabako hiriburuan, eta autoz eraman zuen Agurainera (Araba), urruntzeko agindua indarrean zuen arren. Bidean, emakumeari telefono mugikorra kendu zion, eta arriskuz gidatu zuen, azeleraldi eta balaztada bortitzak eginez.
Poliziaren ikerketaren arabera, Aguraingo etxebizitza batean eduki zuen atxikita, haren borondatearen aurka, eta han egin zion sexu erasoa. Hurrengo egunean lortu zuen biktimak telefonoa berreskuratzea eta etxetik ihes egitea.
Emakumeak aurretik ere salaketak jarriak zituen gizonezkoaren kontra, heriotza mehatxuengatik, derrigortzeengatik eta urruntzeko agindua behin eta berriz urratzeagatik.
Gertatutakoaren berri izan ostean, Ertzaintzak ostegunean atxilotu zuen erasotzailea, Gasteizen. Genero indarkeriagatik aurrekari polizialak ditu. Bihara
