Gasteizko Udaltzaingoak 31 urteko gizonezko bat atxilotu du gaur indarkeria matxistarekin lotuta. 02:00etan jaso du Poliziak abisua: telefonoz jakinarazi diotenez, gizonezko bat mehatxu egiten ari zitzaion bikotekideari labana batekin, Arabako hiriburuko Ariznabarra auzoko etxebizitza batean. Udaltzainak iritsi direnean, han aurkitu dituzte gizona, haren bikotekidea eta emakumearen ahizpa. Gizonezkoak odol orbanak zituen, eta gela batzuetan ere odola zegoen.
Udaltzainek bi emakumeei egindako elkarrizketetan jasotako informazioaren arabera, gizonezkoa goizaldean iritsi da etxebizitzara, eta bi ahizpei mehatxu egin die labana batekin. Bikotekideen artean izandako borroka baten ondorioz, elkarri zauriak egin dizkiote eskuetan.
Emakumeek kontatu dutenez, gizonak maiz iraindu eta mehatxatu izan ditu. Hori dela eta, udaltzaingoak atxilotu egin du gizonezkoa, heriotza mehatxuen eta indarkeria matxistaren delituak leporatuta.
