43 urteko gizon bat atxilotu du Gasteizko Udaltzaingoak, bikotekideari kalean eraso egitea leporatuta. Udaltzainek jakinarazi dutenez, uniformatu gabeko patruila batek bertatik bertara ikusi zuen gizona emakumeari oihuka, besotik oratzen zion bitartean. Emakumeari besoan kolpeak ere eman zizkion gizonak, agenteen aurrean. Hori guztia bikotearen haurra bertan zela gertatu zen, betiere, agenteen bertsioaren arabera.
Hori ikusirik, eta lekukoak eta biktima galdekatu ondoren, udaltzainek atxilo eraman zuten gizona, indarkeria matxista egotzita.
