Ertzaintzak gizon bat atxilotu du bart Getxoko Portu Zaharreko jaietan (Bizkaia), gazte bati sexu erasoa egitea egotzita. Biktimari ukituak egitea leporatuta atxilotu dute.
Getxoko Udalak gertatutakoa «erabat» gaitzetsi du: «Genero ezberdintasunean oinarritutako jarrera sexista guztiak gaitzesten ditugu». Gauza bera egiteko deia egin die getxoztar guztiei, eta «emakumeak iraintzen» dituzten eta «eraso sexistak bultzatzen dituzten jarrerak» ez onartzeko.
Udalak elkartasuna adierazi dio emakumeari, eta babesa adierazi dio. Oharrean defendatu du lanean jarraituko dutela emakumeek sexu harremanak norekin, noiz eta nola izan nahi dituzten askatasunez erabaki dezaketen gizartea lortzeko, alegia, haien nahia erabat errespetatzen duen gizarte bat lortzeko.
