Ertzaintzak 21 urteko gizonezko bat atxilotu du Irunen (Gipuzkoa), emakumezko bati sexu eraso bat egitea leporatuta. Eusko Jaurlaritzaren Segurtasun Sailaren arabera, atzo goizaldean gertatu zen erasoa, Irungo etxebizitza batean, 02:30 inguru zirenean.
Biktimaren kontakizunaren arabera, bere lagun batekin eta bi gizonezkorekin batera joan zen gizonezkoetako baten etxera. Horietako batekin bakarrik geratu zen logela batean, eta gizonak atea itxi zuen. Jarraian indarrez heldu zuen, ohera bota zuen, eta ukituak egiten hasi zitzaion. Baina emakumezkoak etxe horretatik alde egin ahal izan zuen, eta salaketa jarri zuen Ertzaintzaren Irungo komisarian.
Jaurlaritzaren arabera, behin salaketa jarrita Bidasoko Ospitalera eraman zuten, artatu zezaten. Erasotzailea epailearen esku utzi dute.
