Gizon bat atxilotu zuten atzo Zizur Nagusian (Nafarroa), adingabeko bati sexu eraso bat egitea egotzita. Herriko festetan adingabeko neska bati ukituak egiteagatik atxilotu zuten foruzainek.
Zizur Nagusiko Eraso Matxisten Kontrako Mahaiak ohar batean adierazi du «edozein formatako indarkeria matxista» gaitzesten duela. Udalarekin batera, Mujeres Libres, Zizurko Talde Feminista eta Emakume Zizurtarrak taldeek osatzen dute mahai hori. Gaineratu dute festek espazio seguruak izan behar dutela, guztiek «gozatzeko» eta «askatasunez» haremantzeko, «inolako erasorik jasateko beldurrik gabe». Babesa eta elkartasuna adierazi diote erasotuari eta senideei, eta erantsi dute biktimaren intimitatea errespetatuko dutela eta berriz biktimizatzea saihestuko dutela.
Erasoa salatzeko elkarretaratzea egingo dute bihar, 19:30ean, Zizurreko Erreniega parkean. Herritarrei dei egin diete erasoa publikoki gaitzestera, eta indarkeria matxistarik gabeko jaien alde egitera.
Gasteizen beste bi eraso
Gasteizen 27 urteko beste gizon bat atxilotu zuten atzo, sexu eraso bat leporatuta. Eguerdian gertatu zen, Gazalbideko parkean: emakume bati ukituak egin zizkion gizon batek. Ostiralean, berriz, 19 urteko gizon bat eta emakume bat atxilotu zituzten bikote eztabaida batean elkarri lesioak eragitegatik.
