Ertzaintzak 24 urteko gizon bat atxilotu du, Usurbilen (Gipuzkoa) emakume bat hiltzen saiatzea egotzita. Epailearen aurretik pasatu ostean, gizonezkoa espetxera bidali dute.
Ertzaintzak azaldu duenez, larunbatean, 21:00ak aldera, gizon bat kalean oinez zihoan emakume bati dirua eskatzera joan zen Usurbilgo Kalezar auzoan. Emakumeak ezetz esan zion. «Gizona atzetik hurbildu zitzaion, eta soka batekin lepoa inguratu eta itotzen saiatu zen. Biak lurrera erori ziren». Orduan, Poliziaren arabera, gizonak emakumearen gerriko poltsa hartu zuen, eta korrika alde egin zuen. Emakumea inguruko baserri batera joan zen laguntza eske, eta Ertzaintzara deitu zuten.
Biharamunean atxilotu zuten gizonezkoa, baserri batean. Hasieran, beste gizon bat ere atxilotu zuten, baina hura aske laga dute, Ertzaintzaren esanetan polizia etxean egiaztatu zutelako 24 urteko atxilotuak bakarrik parte hartu zuela gertakarian.
