50 bat urteko gizon batek istripua ukan zuen atzo gauean, 21:00 aldera, Bokalen (Lapurdi) autoz zebilela: biribilgune bat huts egin, eta Aturriko uretara sartu zen zuzen. Sorosleek sei metroko sakoneran atzeman zuten autoa, eta handik atera. Gizona hil da, ezin salbaturik; ez zen Euskal Herrikoa.
Gaua zenez eta autoa uretan zenez, 30 bat suhiltzailek parte hartu zuten operazioan: inguruak ahal bezala argitu, eta sorosleen arteko urpekariek uretara jauzi egin zuten. Autoa sei metroko sakoneran zegoen. Gizona autotik atera zuten, eta ur azalera ekarri, baina bihotzekoa ukana zuen jadanik, eta ez zuen gehiago arnasarik hartzen. Haren salbatzen entseatu ziren, baina ez zuten lortu.
Tresneria eta kamioi bereziak baliatuz, uretatik atera zuten autoa gero.
