Gizon batek etxean giltzapetuta zeuzkan emaztea eta beren bi alaba adingabeak, eta Bilboko Udaltzaingoak erreskatatu egin ditu gaur goizaldean, Errekalde-Larraskitu auzoan. Iturri ofizialen arabera, emakumeak deitu du laguntza eske, eta, Polizia etxera iritsi denean, gizonak alde egin du, leihotik. Udaltzaingoa haren bila ari da.
Emakumeak udaltzaingoari bart jakinarazi zionez, senarrarekin eztabaidan ibili, hura mehatxuka hasi, eta etxetik irtetea galarazi zien berari eta bien alabei —8 urte ditu batek, eta 10 besteak—. Polizia hara iritsi zenean, gizonak esan zien ez emakumea ez alabak ez zeudela etxean, eta ez zien atea ireki. Azkenean, udaltzaingoa indarrez sartu zen etxebizitzan.
Iturri ofizialen arabera, gizonak aurrekari penalak ditu: kartzelan egon zen, eta urruntze aginduak ezarri dizkiote zenbaitetan.
