Urtarrilaren 12az geroztik desagerturik zen gizonaren gorpua atzeman zuten atzo, Aturri ibaiko uretan, Gixunen (Lapurdi). 82 urte zituen gizonak, eta Gabadikoa zen, Amikuzekoa (Nafarroa-Beherea).
Atzo goizean, 11:40 aldera, Gixuneko zenbait herritarrek suhiltzaileei dei egin zieten gorpu bat ikusi zutelako uraren azalean. Orduan itsas sorosleen taldea bertaratu zen, baita jendarmeria ere, eta gorpua uretatik atera zuten. Erran dutenaz, gizona bere herritik hamabi bat kilometrora atzeman dute.
Ikerketa abiatu dute nola hil zen argitzeko.
