Udaltzaingoak 21 urteko gizonezko bat atxilotu zuen atzo gauean Gasteizen, indarkeria matxista leporatuta. Erasoa 21:30 aldera gertatu zen, Errege-erregina Katolikoen kalean. Poliziak lekuko baten deia jaso zuen, eta hark esan zien gizonezko bat andrazko bati eraso egiten ari zitzaiola kalean bertan. Udaltzainak bertaratu egin ziren, baina gizona ihes eginda zegoen ordurako.
Udaltzaingoak jakinarazi duenez, andreak zauriak zituen ezpainetan, eta osasun arreta eman behar izan zioten. Poliziek bilaketa abiatu zuten inguruan, eta, handik gutxira, gizonezkoa gertuko kale batean topatu zuten. Hura atxilotu eta komisariara eraman zuten gero.
