Tuterako Udaltzaingoak (Nafarroa) 48 urteko gizonezko bat atxilotu zuen atzo, bikotekidearen kontrako tratu txarrak egotzita. Poliziak azaldu duenez, 12:00ak aldera, indarkeria matxistaren biktimen arretarako telefonoaren bidez (016), laguntza eske ari zen emakume baten egoeraren berri izan zuten. Agenteak etxebizitzara bertaratu ziren, eta gizonezkoa atxilotu zuten, familia esparruko tratu txarren delitu bat egotzita.
Gizonezkoa Foruzaingoaren esku utzi zuten udaltzainek, epailearen aurretik igaro dadin. Biktima, 28 urteko emakumezkoa, osasun zerbitzuetara eraman zuten, jasandako lesioak artatzeko.
