Bilboko gizonezko bat hil zen atzo iluntzean Bakioko hondartzan, Bizkaian. Eusko Jaurlaritzako Segurtasun Sailaren arabera, 20:15 inguruan herritar batzuek ikusi zuten gizonezko bat itsasoan zegoela, uretatik atera nahi eta ezin.
Gizonezkoa alaba adingabea laguntzera sartu zen uretara, itsasotik atera ezinik zebilela eta. Surflari batzuen laguntzaz atera zen alaba, eta haiexek eraman zuten aita itsasertzera.
Lehorrean, gizonezkoa suspertzen ahalegindu zen Ertzaintza. Anbulantzia bat heldu zen geroago, baina osasun arloko langileek ere ezin izan zuten gizonezkoa onik atera, eta hondartzan bertan hil zen. Auzitegi medikuntzako institutura eraman zuten gorpua, gizona nola hil zen ikertzeko.
