Taxian –ez Uber batean–, eta minutu batean. Horrela laburtu du Miren Gorrotxategi Elkarrekin Podemoseko lehendakarigaiak beren programa. Durango (Bizkaia) du abiapuntu, eta lehendakaritza helmuga. Autoak bidea hasi bezain laster abiatu du hautagaiak 60 segundoko lasterketa, eta Osakidetza, alokairuen prezioa eta zaintza zerbitzuak izan ditu hizpide.
Azaldu du Osakidetzan pribatizatuta dauden zerbitzuak «berreskuratu» nahi dituztela: «Hala nola proba diagnostikoak, anbulantziak, sukaldeak, garbiketa; eta zerbitzuak zabalduko ditugu, dentista, optika, fisioterapia, osasun mentala, podologoa edo logopeda». Alokairuen prezioa jaitsi nahi dutela ere erran du, eta horretarako Espainiako Etxebizitza Legea aplikatuko dutela. «Sustapen publiko guztiak alokairu sozialekoak izango dira. Funts putreei etxebizitzak erostea debekatuko dugu», gehitu du.
¿Elkarrekin Podemosen programa ezagutu nahi?
— Miren Gorrotxategi (@MiGorrotxategi) April 3, 2024
Ba taxi batean azalduko dizuet (ez Uber batean). pic.twitter.com/uj3adkuIPE
Hezkuntza ere hizpide izan du, erran baitu lege bat eginen dutela «eskola publikoa sistemaren ardatza izateko». Eta honela borobildu du: «Segregazioaren aurka borrokatzeko estrategia bat zabalduko dugu, onarpen eta hezkuntza itunen dekretuak aldatuz». Energia enpresa publiko bat sortuko dutela ere erran du, «burujabetza berreskuratzeko eta oligopolioa amaitzeko». «Debekatu egingo dugu administrazioek ikuskizunak finantzatzea animalien sufrimendua dagoenean, hala nola zezenketak», gehitu du.
Azkenaldian pil-pilean egon diren bi gai ere gogora ekarri ditu: zaintza eta euskara. Zehaztu du zaintza zerbitzuak publiko eginen dituztela, soldata arrakala amaitzeko prekaritatearen kontrako plan bat eginen dutela, eta bermatuko dutela euskara ikastea doakoa izatea C1 mailara arte.
Kontagailua zerora iritsi bezain laster, onartu du beren programak bertze neurri anitz dituela, baina helburu bakarrarekin: «Euskadi ezkertiar bat egiteko programa bat, eskuina gure zerbitzu publikoak ahulduz joan den urte askoren ondoren».