Bilboko Errondabide tabernan ere sartu zen Guardia Zibila abokatuen aurkako operazioaren harira. Lokala miatzeaz gain, ordea, langileei eta hornitzaileei ordaintzeko gordetako 14.000 euro ere eraman zituen Guardia Zibilak.
"Lau orduz egon ziren tabernan, eta manifestazioan bildutako diruaren bila zebiltzan aitzakian, sabaiak altxatu eta armairuak indarrez zabaldu zituzten", salatu du tabernako arduradunetako batek. Dirua aurkitu zutenean, berriz, konfiskatu egin zuten, manifestazioan ateratakoa zela esanez.
Erronda kaleko bizilagunek ere bat egin dute salaketarekin, eta gogorarazi dute kale osoa itxita egon zela hainbat orduz, operazioa zela eta.
Errondabidetik ez ezik, LABen Bilboko egoitzatik ere dirua eraman zuten Espainiako segurtasun indarrek, tartean Sarek Bilboko manifestazioan bildutakoa.
