Gure Eskuk «burujabetzaren aldeko herri aktibaziorako deia» egin du gaur eguerdian Larhun mendian, Nafarroa eta Lapurdi arteko mugan. Mugimenduko kideek ikurrina handi bat jarri dute tontorrean, 7,5 metroko mastan, urrundik ikusteko moduan. Horrela, aldarrikatu dute Euskal Herria zazpi lurraldez osatutako nazioa dela eta erabakitzeko eskubidea duela, eta ekainaren 7an Bilbon mobilizatzeko deia egin dute.
«Tontor honetatik, egun eguzkitsu eta argietan, Euskal Herriko zazpi lurraldeak ikusteko aukera izaten da», hasi da Iraitz Lazkano Gure Eskuko zuzendaritzako kidea. «Toki aproposa da Euskal Herriari begiratzeko, herri libre bat eraikitzeko konpromisoa berresteko eta euskal herritarrei dei egiteko: aktiba gaitezen denok, herritarron mobilizazioa ezinbestekoa delako nazio honek aurrerapausoak egin ditzan».
Lazkanok gogorarazi du estatus politikoaren gaia mahai gainean dagoela, eta Euskal Herriko zazpi lurraldeetan dagoela ahalmen politiko gehiago izateko borondatea. «Oso gutxitan gertatu da hori Euskal Herriaren historian».
Gaurko ekitaldia urtero errepikatzeko asmoa dutela esan du, «ikurrina berritzeko eta nazio bera garela aldarrikatzeko», eta gogorarazi du ikur hori euskal herritarrek ordaindu dutela, crowdfunding kanpaina baten bidez. Ekitaldian inguruko zenbait alkatek hartu dute parte: Berako Aitor Elexpuruk, Urruñako Filipe Aramendik eta Ziburuko Eneko Aldanak.
