Hauteskunde Legea aldatzeko «bermeak» eskatu ditu Kalparsorok

ETAk «mehatxatuek» Hego Euskal Herrian bozkatu ahal izan dezaten Espainiako Gobernuak Hauteskunde Legean egin nahi dituen aldaketekin «iruzurrik» gerta ez dadin, «bermeak» eskatu ditu Juan Kalparsoro EAEko Auzitegi Nagusiko fiskalburuak. Kalparsorori «egokia eta positiboa» iruditzen zaio «mehatxatuek» bozkatzeko eskubidea izatea, eta esan du ez duela Espainiako Konstituzioa urratzen. Halere, ohartarazi du salbuespeneko neurria den heinean modu «murriztailean» interpretatu beharko dela, inork lege iruzurrik egin ez dezan. Hala, bozkatu nahi duten pertsonek «baldintza» batzuk bete beharko dituztela iritzi dio, besteak beste, ETAren erruz Euskal Herritik alde egin zutela ziurtatu.