Euskal Herri osoan are gehiago murriztuko dira erretzea baimenduta dagoen eremuak, Espainiako eta Frantziako gobernuek prestatu dituzten neurriak bere horretan indarrean sartzen badira. Kerik gabeko eremu batzuk orokorrak izango dira: esate baterako, autobusen markesinak eta kirol instalazioak. Beste batzuk, berriz, mugaren alde banatan bakarrik ezarriko dira. Adibidez, Hego Euskal Herrian terrazetan erretzea debekatu asmo dute, Espainiako Gobernua prestatzen ari den tabakoaren aurkako lege aurreproiektuaren arabera. Iparraldean, berriz, hondartzak, parkeak eta eskola inguruak hartuko ditu debekuak, besteak beste. Murrizketak aplikatzen hasteko egun bat ere ezarri du Frantziako Gobernuak: uztailaren 1a.
Espainiako Gobernuak ohar bidez jakinarazi duenez, erretzea debekatuta dagoen eremuak areagotzea da legearen helburu nagusietako bat. Horiek horrela, aurreproiektua lege bihurtzen bada, Hego Euskal Herrian ezingo da terrazetan erre; baina ezta markesinetan, lanerako diren ibilgailuetan, unibertsitate campusetan, institutuetako patioetan, kirol instalazioetan, erabilera kolektiborako igerilekuetaneta aisialdirako aire zabaleko guneetan ere. Dena den, Osasun Ministerioak oraindik ez du «guztiz zehaztu» zer eremutan galaraziko duten erretzea. Aurreproiektua lege bihurtzeko, zirriborroa aurkeztu ostean, Ministroen Kontseiluak onartu behar du, eta, gero, Kongresuak onetsi beharko du.
Frantziako Gobernuak, berriz, dekretu bidez ezarriko ditu neurriak. Catherine Vautrin Osasun ministroak Ouest-France egunkarian eman du bere asmoen berri. Uda hasieran sartuko dira indarrean, eta arauak urratzeagatik 135 eurorainoko isuna ezar dezakete. Espainiakoek bezala, Frantziako murrizketek ere aire zabaleko eremu handiak hartuko dituzte, eta ministroak ikastetxeen kanpoaldeetan debekatzeari garrantzi berezia eman dio, «ikasleek ez dezaten erre egoitzaren aurrean». Frantziako Gobernuak oraingoz ez du terrazetan erretzea debekatzeko asmorik.
