Helegitea jarri du Asel Luzarragak bere aurkako prozesuaren kontra

Askel plataformako iturriek jakitera eman dutenez, Asel Luzarraga idazleak bere kontra Txilen burututako prozesuaren aurkako helegitea jarri du. Lehendabiziko errekurtso hori onartzen ez badute, ondoren haren abokatuak epaiketaren aurkako helegitea jartzeko asmoa du. Abiatu berri duen prozesuak gutxienez hilabete iraungo duela esan du Luzarragak, eta, beraz, oraingoz itxaron egin beharko dela zer gertatzen den ikusteko. Bitarte horretan ezin dute Txiletik kanporatu. Iragan irailaren 9an 220 eguneko espetxe zigorra ezarri zioten Asel Luzarragari, baina zigor hori baino handiagoa betea du dagoeneko. Iazko abenduaren 31n atxilotu zuten, lehergailuekin egindako atentatu batean lotura izatea egotzita. Behin eta berriz esan du idazleak «erabat errugabea» dela.