Ibai Iriarte Tolosako alkateak, Igaro Balda Hernialdekoak eta Pedro Maria Estanga Anoetakoak "kezka" agertu dute AHTko obretan gertatutakoarekin. Haien arabera, Hernialden agertutako zuloak "soro batean" izan du eragina, baina "noiznahi baserri bat irents dezakeela" uste dute. "Nork dio etorkizunean besterik agertuko ez denik?". Hiru alkateek agerraldia egin dute.
Jakinarazi dute atzo izan zutela zuloaren berri. Hori horrela, Eusko Jaurlaritzak, Adifek eta ETSk izandako jarrera salatu dute, informazioa ez emateagatik. Diotenez, obrek "ez dute zentzurik", hiru arrazoirengatik: "izugarrizko diru xahuketa delako, ingurumenarekiko eraso handia delako, eta ez dielako herritarren beharrei erantzuten".
Horregatik guztiagatik, "etorkizunagatik eta segurtasunagatik", AHTko obrak atzeratzea eskatu dute, gaiaren inguruan "sakon eztabaidatu eta gizartean benetako eztabaida bat izan bitartean".
