Pertsona bat hil eta beste bat zauritu da gaur Iruraiz-Gaunan (Araba), bi ibilgailuk aurrez aurre talka egin dutela eta. Istripua Azazeta mendatean izan da, A-132 errepidean, 16. kilometroan, eta, horren ondorioz, bidea moztu dute bi noranzkoetan.
Ertzaintzak jakinarazi duenez, ezbeharra 11:00etan gertatu da, A-132 errepidean. Larrialdi zerbitzuak berehala bertaratu dira, biktimei laguntzeko.
Suhiltzaileek ibilgailuan harrapatuta geratu den gidarietako bat askatu behar izan dute, eta, ondoren, Gasteizko Txagorritxu ospitalera eraman. Osasun langileek beste gidaria artatu dute, baina oso larri zegoen, eta bertan hil da.
Istripuaren ondorioz, errepidea erabat itxi dute, eta zirkulazioa inguruko bideetatik desbideratu.
