Realaren urazpiko jardueretarako sekzioak adierazi duenaren arabera, taldeko urpekariek dozenaka katu-marrazo topatu dituzte hilik Getariako (Gipuzkoa) portuaren bokalean, itsas hondoan. Kantauri Itsasoko ohiko espeziea da, 40-50 zentimetro inguru luze dena, eta, arrantza jarduerak direla-eta, arriskuan dagoen espeziea, sekzioko urpekariek adierazi dutenez.
Horregatik, urazpiko jardueretarako sekzioak arrantza sektoreari egotzi dio jazotakoa, eta «tragedia» gisa sailkatu du. Uste dute arrantza bazterkinak izan direla, eta arrantza sareek «inpaktu suntsitzailea» dutela urpeko faunan.
Diego Carral eta Andoni Bengoetxea argazkilariek lortu dute arrain hilei argazkiak egitea, eta urpekarien taldeak salatu du itsasora hilda jaurti dituela norbaitek, inolako «zentzurik gabe». Antza, «jasangarriak ez diren praktika» horiek denbora daramate espezie horri kalte egiten.