Hiru gizon atxilotu dituzte Elizondon eta Iruñean, bikotekide ohien aurkako indarkeriagatik

Foruzainek azkeneko astean hiru gizonezko atxilotu dituzte Nafarroan, bikotekide ohien aurka indarkeria erabili dutelakoan.

Elizondon ostiralean 32 urteko gizon bat atzeman zuten, emazte ohiari ustez tratu txarrak eta erasoak eragin dizkiolako. Biktimak salatu zuenez, ostegunean senarra izandakoak eskuak lotu zizkion eta jo egin zuen. Lehen ere tratu txarrak jaso izan dituela zioen.

Ostegunean 39 urteko gizon bat atxilotu zuten Iruñean, emazte ohiarekiko daukan urruntze agindua hautsi egin zuela egotzita.

Iruñean bertan asteazkenean beste gizonezko bat atzeman zuten, 61 urtekoa, bikotekide ohiak tratu txarren salaketa jarri ondotik. Emakumezkoak zioen jazarpenak, mehatxuak eta irainak jaso zituela.