Hiru lehergailu txiki topatu dituzte gaur goizean su-hiltzaileek Lapurdin: Baionan, Bokalen eta Miarritzen. Indargabetu egin dituzte eta Frantziako Poliziak eraman egin ditu, ikertzeko.
Polizia iturriek jakinarazi dutenez, su-hiltzaileek dei anonimo bat jaso dute, Baionan eta Miarritzen bi lehergailu zeudela esanez. Butano-botila txikiak ziren, iratzargailu banarekin. Baionakoa 10:30ean lehertzeko prestatuta zegoen, baina ez du eztanda egin, eta su-hiltzaileek 11:10ean indargabetu dute. PS alderdiaren egoitzatik gertu zegoen lehergailua, zakarrontzi batean. Badaezpada, eraikina hustu egin dute.
Miarritzen, berriz, Turismo bulegoaren ondoan kokatua zegoen ezkutatuta, hesi-lanak egiten dituen zuhaixka batean. Hark ere huts egin du eztanda egitean.
Bokaleko lehergailua ere PS alderdiaren egoitzatik gertu aurkitu dute. Ez dute jakinarazi zertaz osatutakoa zen.
Hiru lehergailu txiki jarri dituzte Baionan, Bokalen eta Miarritzen
Butano-botila txikiak ziren, iratzargailu banarekin, eta ez dute eztanda egin. Baionako eta Bokaleko lehergailuak PS alderdiaren egoitzatik hurbil zeuden, eta Miarritzekoa Turismo bulegoaren inguruan.
Iruzkinak
Ez dago iruzkinik
Ordenatu
