Nafarroako Auzitegiak hiru urte, hilabete eta hamabost eguneko kartzela zigorra ezarri dio Iruñeko gizon bati, bere bikotekidea bortxatu eta tratu txarrak emateagatik. Ebazpenean zehaztu dutenez, akusazioak, defentsak eta fiskaltzak akordio bat erdietsi dute, eta bi aringarri aplikatu dizkiote gizonari: «Kaltea konpontzea» eta «buru nahasmendua izatea».
29 urteko gizonak bi aldiz bortxatu zuen bikotekidea, 2023ko irailean eta urrian. Delitu horrengatik, hiru urteko kartzela zigorra ezarri diote. Emakumeari tratu txarrak ematea ere egotzi diote, eta delitu horrengatik hilabete eta hamabost eguneko espetxe zigorra eta 540 euroko isuna ezarri dizkiote. Bi delituetan aplikatu dizkiote aringarriak. Horrez gain, gizona ezin izango da emakumearengandik berrehun metrora baino gehiagora hurbildu datozen zazpi urteetan, eta espetxe zigorra bete ondoren zaintzapeko askatasunean egon beharko du bost urtez.
Nafarroako Auzitegiaren arabera, gizonak maiz «iraintzen» zuen emakumea, «jo» egiten zuen, eta «haserretu» egiten zen beste pertsona batzuekin hitz egiten bazuen.
