Sirian Homs hiritik gertu azkeneko orduetan izandako liskarretan hogei lagun hil dira, eta beste ehunen bat zaurituta daude.
Oposizioko kide baten hileta batean gertatu dira iskanbilak, Talbisa herrian, Al Jazeera telebista kateak esan duenez. Ez du zehaztu hildakoen artetik zenbat diren oposiziokoak eta zenbat gobernuaren polizia indarretakoak. Al Jazeerak dio gobernuaren aldeko zibilek ere oposizioko kideen aurka egin dutela, tiroz.
Siriako Barne Ministerioak esan du talde batek lau zibil hil zituela tiroz, eta ondoren hasi direla liskarrak. Sana Siriako agentzia ofizialak, berriz, dio talde batek polizia bat hil duela lehenik, eta ondoren hiru ekintzaile zendu direla tiroketan.
Gobernuari erreforma politikoak egiteko eskatzen ari da oposizioa.
