Gipuzkoako Foru Aldundiak jakinarazi du Iñaki Errazkin izango dela Ingurumen eta Lurralde Antolaketa diputatu berria. Astelehenean hartuko du kargua. Martin Garitano ahaldun nagusiak gaur sinatu du Juan Carlos Alduntzin postutik kentzeko agindua. Garitanok azaldu du Errazkinek "ibilbide luzea eta esperientzia handia" duela hondakinen kudeaketan eta horregatik hautatu dutela kargurako.
Haritz Salaberria Lezoko alkate ohi eta ahaldun nagusiaren kabineteko taldeko kideak kargua hartuko zuela zabaldu zen duela egun batzuk, eta Larraitz Ugarte diputazioko bozeramaileak hala berretsi zuen, prentsaren aurrean. Gaur, ordea, agerraldia egin du Martin Garitano ahaldun nagusiak, eta jakinarazi du Iñaki Errazkin izango dela Alduntzinen ordezkoa.
Errazkin Azpeitiko alkate izan zen aurreko agintaldi hasieran. Iazko hauteskundeez geroztik, Gipuzkoako ahaldun nagusiaren kabinete burua izan da. EAJk, PSE-EEk eta PPk Alduntzin kargutik kentzeko zentsura mozioa aurkeztu, eta onartu egin zuten Batzar Nagusiek uztailaren 6an.
PSE-EEk aste honetan egonezina agertu du diputazioa Alduntzinen kargugabetzea atzeratzen ari zelako. Ahaldun nagusiak astelehenean kenduko du Alduntzin kargutik, eta orduan hartuko du ardura berria Errazkinek.
