Etxerat elkarteak jakinarazi duenez, Ibon Iparragirre Burgoa Ondarroako preso politikoa Basauriko espetxera iritsi da, Sevillako espetxetik atera zutenetik zortzi egun pasatu ondoren. Zortzi egun hauetan Iparragirreren familiakoek ez dute haren berri zuzenik izan.
Gaixotasun larri eta sendaezin bat du Iparragirrek, seropositiboa da eta gorputzeko defentsen herenak galduak ditu horregatik. Trasladoak iraun duen zortzi egunetan haren egoera larritu egin dela salatu du Etxerat-ek. Gainera, beste edozein gaixotasun hartuz gero, bueltarik gabeko ondorioa izan dezake euskal presoarentzat.
Senideek jakinarazi dutenez, Iparragirre "oso nekatuta" iritsi da Basauriko espetxera.
Etxerat-ek, azkenik, gaixotasun larri eta sendaezinak dituzten euskal presoak berehala askatzeko exijitu du.
