Ibon Iparragirreren egoera "mugara" heldu dela salatu dute Sarek eta Etxerat-ek Bilbon egin duten elkarretaratzean. Angelita Burgoa amak jakinarazi du euskal presoa artatzera joandako mediku guztiak bat datozela "bihar edo datorren astean" hil daitekeela, eta "berehalakoan" utzi behar dutela aske. "Castro epailearekin hitz egin dute, baina hark ez die kasurik egiten".
Protestan parte hartu dute ELA, LAB, CCOO, Steilas, Hiru, UGT, Exalde, ESK eta EHNE sindikatuetako ordezkariek. "Ez dugu onartuko Ibon Iparragirre espetxean hiltzea; berehala askatu behar dute", adierazi du Garbiñe Aranburu LABeko idazkari nagusiak.
Madrilen ere preso ondarroarraren egoera izan dute hizpide Senatuko barne gaietarako batzordean. EH Bilduko senatari Jon Iñarrituk egin dio galdera Segurtasunerako estatu idazkari Jose Antonio Nietori. Iñarrituk salatu du kartzeletako zaintzako arduradunak eta Jose Luis Castro epaileak elkarri egozten diotela ardura, eta bitartean presoaren egoerak okerrera egiten jarraitzen duela.
Nietok, ordea, presoaren bizitza "arriskuan" dagoela onartu duen arren, zehaztu du Iparragirre bera dela botikak hartzeari uko egin diona, eta tratamenduari berriz ekingo balio "gaixotasunari eutsi eta bizitza luzea eduki" ahalko lukeela. Bidez batez, ukatu egin du "hiltzeko arriskuan" den presorik dagoela Espainiako espetxeetan.
