Zirimolak, Ikastolen elkartearen aisialdi taldeak, udako eskaintzaren berri eman du. Nabarmendu dute «zabalagoa eta bidezkoagoa» izango dela. Hain justu, umeentzat euskarazko leku gehiago eskainiko dituzte: 1.200etik 1.680ra ugarituko dituzte. Eta beka sistema propio bat jarriko dute martxan, «haurrek eta gaztetxoek euskarazko uda esperientziak eskuragarri izateko, haien egoera ekonomikoa edozein dela ere».
«Euskararen egoerak neurri ausartak eskatzen ditu». Horregatik, Ikastolak elkarteak aisialdian eragin asmo du: «Zirimolak pauso sendoa emango du». Besteak beste, udaleku irekiak, egonaldiak, kirol jarduerak, gazteentzako egonaldiak eta topaketak antolatzen dituzte, eta handitu egingo dute euskarazko lekuen kopurua: 1.200etik 1.680ra, hain zuzen. «Ikastolen mugimenduarentzat haurren eta gazteen aisialdia ere euskararen normalizazio prozesuaren ardatz estrategikoa da».
Horretaz gainera, haur eta nerabe orok jarduera horietan parte hartzeko aukera izatea dute xede. Horretarako, beka sistema propio bat ondu dute aurtengo udarako; hain zuzen, 50 leku gordeko dituzte «egoera zaurgarrian dauden haurrentzat eta gaztetxoentzat». Zera nahi dute: euskarazko udalekuetan eta egonaldietan parte hartzeko aukera bermatzea, «errenta maila edozein dela ere».
Izen ematea, gaurtik aurrera
Beka sisteman sartu nahi dutenek gaurtik dute aukera www.zirimola.eus webgunean izena emateko; bekarik behar ez dutenei, berriz, martxoaren 4an zabalduko diete horretarako aukera.
