Indonesiaren okupazioaren ondorioz 183.000 timortar hil zirela dio Egiaren eta Adiskidetzearen Batzordeak

Indonesiaren okupazioak iraun zuen bitartean, eta haiek ezarritako errepresio eta zapalkuntzaren ondorioz, Ekialdeko Timorko 183.000 bizilagun hil ziren. Kopuru izugarri hori Harrera, Egia eta Adiskidetzearen Batzordeak egin duen ikerketaren emaitza da; areago, heriotza horien %70 Ekialdeko Timorko soldadu eta poliziek eta haiek armatutako timorko miliziek zuzenean eragin zituztela zehaztu du txostenak.

Nolanahi ere, Egia eta Adiskidetzearen Batzordearen txostenaren emaitzak ez dira oraindik ofizialki jakinarazi; Australiako ABC telebista kateak eman du gaur haren berri. Izan ere, Batzordeak Xanana Gusmao Ekitaldeko Timorko presidentearen esku utzi zuen ikerketa, eta hark Legebiltzarrari eman zion, NBEra eramateko kalteordainei buruzko proposamena landu dezan.

ETAN Ekialdeko Timor eta Indonesiarako Ekintza Sarea taldea, ordea, lehenbailehen argitara dadin presioa egiten ari da. Talde horrek proposatzen du kalteordainen zati bat AEBek eta Erresuma Batuak eta nazioarteko arma trafikatzaileek ordaintzea. Izan ere, Portugaletik indepedentzia lortu eta segituan, 1975eko abenduan, Indonesiak menpean hartu zuen Ekialdeko Timor, eta talde horren arabera, AEBren, Erresuma Batuaren, Japoniaren eta Australiaren babes tazitoa izan zuen Jakartak inbasioa aurrera eramateko.

1999ko abuztuaren 30ean autodeterminazio erreferenduma egin zen Ekialdeko Timorren, eta gehiengo handiak Indonesiaren barruan jarraitzeari uko egin zion.