Iruñerriko bigarren hezkuntzako institutu bateko irakasle bat ikertzen ari da Foruzaingoa, intimitatearen aurkako delitu baten ustezko egilea delakoan. Egozten diote emakumeak biluzik grabatu izana, irakasleentzako komunetan jarritako kamera baten bidez. Iruñeko 4. Instrukzio Epaitegiak agindu zuen ikerketa duela zenbait hilabete, emakume batek jarritako salaketaren ostean. Foruzaingoaren arabera, gainera, institutuan ez ezik, Iruñerriko saltoki batzuetako aldageletan ere grabatu izan ditu emakumeak.
Auzia zabaldu eta berehala, gizona atxilotzeko eta etxean zituen gailu informatikoak konfiskatzeko agindua eman zuen epaileak. Gailu horietan atzeman dute institutuko eta saltokietako material grafikoa. Ikerketa zabalik da oraindik, eta ez dago argi zenbat emakume izan diren eraso horien biktima.
Albistea bolo-bolo ibili da Iruñerriko hezkuntza komunitateko kideen artean. Itaia gazte erakundeak protestara deitu du gaur iluntzerako: elkarretaratzea eginen dute 19:00etan Iruñeko Udaletxe plazan, Indarkeria matxista orori aurre egin! lelopean.
