Auto istripu lazgarria gertatu da gaur goizaldean Iturmendin (Nafarroa). 19 urteko neska bat hil da, Beriaingoa, eta ibilgailuaren gidaria atxilotu egin du Foruzaingoak, alkoholemia proban positibo eman baitu. Ilardiko pistan gertatu da ezbeharra, autoa errepidetik irten denean.
Jakinarazi dutenez, ibilgailuan sei lagun zihoazen, eta neska airean atera da maniobra batean. Larrialdi zerbitzuek 06:52an jaso dute abisua, eta, Foruzaingoaz gain, anbulantziak eta suhiltzaileak ere joan dira bertara.
Aurrez, bizilagun batek ere dei egin dio Foruzaingoari, norbait ausarkeriaz gidatzen zebilela eta. Polizia heldu denerako, ordea, berandu zen: autoak istripua izana zuen, eta iraulita zegoen. Neska orduantxe zendu da.
Gidaria 28 urteko gizonezko bat da, eta zuhurtziagabekeria larriak eragindako hilketa egotzita atxilotu dute. Gorpua, berriz, Auzitegi Medikuntzako Nafarroako Institutura eraman dute, autopsia egiteko.
