Itziar Alba Orbegozo 83 urte zituela zendu da. Hezkuntza sailburuorde izan zen Jose Antonio Ardanza buru zuen Eusko Jaurlaritzan, 1986. urtean, eta Eusko Legebiltzarreko kide izan zen bi legealditan; parlamentuko Mahaian ere eserlekua izan zuen. Baina ardura instituzionalez gain ibilbide oparoa izan zuen EAJren barruan, zuzendaritza karguak bete baitzituen hala EBB Euzkadi Buru Batzarrean nola GBB Gipuzko Buru Batzarrean.
Alba Orbegozo Goizuetan (Nafarroa) jaio zen, eta 1990eko hamarkadan, Eusko Legebiltzarrean emakume gutxi zeuden garaian alegia, legebiltzarkide izan zen zortzi urtez. EAJren banaketa iritsi zenean, 1986an, jeltzaleen aldeko apustua egin zuen, eta ez ziren asko izan ataka horretan EAJren alde egin zuten alderdiko zuzendaritzako emakumeak. Irakaskuntzan aritu zen urte askoan, esaterako Zarauzko institutuan (Gipuzkoa).
Haren aldeko hileta elizkizunak gaur egingo dituzte, Donostiako Aita Karmeldarren elizan, 19:30ean. EAJk sare sozialetan eman du Alba Orbegozoren heriotzaren berri. «Euskaltzale eta abertzale, GBBko eta EBBko burukide, legebiltzarkide eta Hezkuntza sailburuorde izan zen», idatzi du EAJk. «Eskerrik asko Euskadiren alde emandako guztiagatik. Herri askeen egun handira arte», bukatzen da X sarean hedatu duten mezua.
