Izurrian gazteria «kriminalizatu» dela ikusi dute

GASTEIZ. Gazteen Euskal Behatokiak Gazteak eta pandemia. Adituen begiradak izeneko ikerketa aurkeztu zuen atzo Eusko Legebiltzarrean. Adituen ekarpenak oinarritzat hartuta, COVID-19aren pandemiak gazteengan izan dituen ondorioak aztertu dituzte txostenean, askotariko ertzetatik. Ondorioztatu dutenez, izurriak areagotu egin ditu gazteek lehendik zituzten gabeziak, eta handitu egin du haien «ziurgabetasuna». Besteak beste, izurrian gazteen buruko osasunak okerrera egin du, eta haien arteko «arrakala soziala» handitu egin da, txostenean jaso dutenez. Halaber, adituek ohartarazi dute gazteak «kriminalizatu» egin direla, «jomugan» jarri eta kutsatzeen erantzule egin dituztela.