Egungo eredua baztertu eta berri bat egitea proposatu du EH Bilduk. Hala, apustua egin du derrigorrezko hezkuntza bukatutakoan euskararen eta gaztelaniaren erabateko ezagutza bermatuko duen murgiltze ereduaren alde. Jaurlaritzaren iritzian, baina, hori ez da beharrezkoa. Gaur egun indarrean dauden Euskal Eskola Publikoaren Legeak eta Euskararen Erabilera Arautzeko Oinarrizko Legeak euskararen erabilera ondo arautzen dutela uste du Jaurlaritzak, eta horregatik ez du beharrezko ikusten EH Bilduk proposatutako legea.
Duela 30 urte Euskararen Erabilera Arautzeko Oinarrizko Legea onartu zutenean "gizartearen gehiengoaren adostasuna" izan zela nabarmendu du Jaurlaritzak, eta lege hori aldatzekotan "ahalik eta adostasun zabalena" behar dela nabarmendu du.
