2005eko aurrekontuen bidez Jaurlaritzak «berrikuntzari, garapen iraunkorrari eta kohesioari» bultzada eman nahi diola azaldu zuen lehendakariordeak. Haren hitzetan, aurrekontu proiektu «orekatua» da, eta aurreko urteotako irizpideetan oinarritua dago.
Aurtengo aurrekontuetan bezala, Osasun eta Hezkuntza arloek eramago dute gastuen zatirik handiena: ia %60. Zehazki, Osasun Sailaren aurrekontua %7 gehituko da, eta Hezkuntza Sailarena %5,3. Departamendu horien atzetik,Herrizaingo Sailak du aurrekontu handienetarikoa, eta aurtengo aurrekontuarekin alderatuta, %4,2 igoko da.
Gastu sozialari bideratuko dio, berriro ere, aurrekontuaren zati handiena, «herritarren arteko aukera berdintasuna eta kohesioa bermatze aldera». Hala, gastu soziala gastu osoaren %72koa izango da, aurten baino %6 gehiago. Besteak beste, giza larrialdietarako laguntzetarako 25 milioi euro bideratuko dira, eta Bigarren Etxebide Plan Zuzentzailerako diruak%18,14 egingo du gora (316,3 milioi euro).Aurrekontu ekonomikoarekin batera, EAEko joera ekonomikoak ere aipagai izan zituen lehendakariordeak. Hala, aurten BPG %2,7 haziko dela espero du Jaurlaritzak, eta %3 datorren urtean. Langabezia tasa, berriz, jaistea espero dute, aurtengo %8,2tik 2005eko %7,9ra.
Eskumenen auzia
Zenbaki nagusiekin batera, bestelako datuak ere azpimarratu zituen Zenarrutzabeitiak. Hau da, Espainiako Gobernuak eskualdatu gabe dituen transferentziak direla medio, Jaurlaritzak 200,6 milioi euroko gastua egin behar duela. Gogoratu zuenez, 2003. urtean kopuru hori 168,4 milioi eurokoa zen, eta aurtengo aurrekontuetan, berriz, 183,3 milioikoa. Salatu zuenez, Gernikako Estatutua onartu eta 25 urte pasatu ondoren, xedapenak «urratuta, bete gabe eta garatu gabe» daude oraindik ere.
-
EAEko aurrekontuak
eskumenen transferentzia ezak eragindako gastua
Espainiako Gobernuak eskualdatu gabe dituen eskumenak direla medio, EAEko gobernuak espero du 200,6 milioi euro gastatuko dituela 2005ean (2003an 168,4 milioi gastatu zituen, eta 2004an 183,3 milioi). Estatutua «bete gabe» egotea salatu zuen Zenarrutzabeitiak.
Barne produktu gordina
Jaurlaritzak espero du aurten EAEko Barne Produktu Gordina %2,7 haztea dela, duela urtebete egindako aurreikusi bezala. 2005. urterako, berriz, ekonomia %3 haziko da.
inbertsio planak
Datorren urtean inbertsio ahalegina, besteak beste, arlo hauetan zehaztuko da:Inbertsio Publikoari Finantza Laguntza Emateko Esparru Planak: 84,5 milioi bideratuko ditu.
Euskadi Informazio Gizartean: 66,8 milioi euro.
Zientzia eta Teknologia: 118,3 milioi euro (aurten baino %16,9 gehiago).
Giza Larrialdietarako laguntzak: 25 milioi euro.
Enpleguaren Erakunde arteko Plana: 48,5 milioi euro.
Etxebide Plan Zuzentzailea: 316,3 milioi 2005erako (aurten baino %18,14 gehiago).
