Euskal Irratiek zabaldu dute berria: Jean Dominique Iriart Jando Larraineko (Zuberoa) auzapeza zendu da gaur, supituki; ez zituen 70 urteak beteak. Larraineko auzapeza zen 2020ko herri bozetatik geroz.
Ezkerrekoa zen Iriart, abertzalea, eta beti borrokatu zen Larraineko lepoko Uturzaetako pasabidea irekirik atxikitzeko, zeinak Hego eta Ipar Euskal Herria batzen baititu. Batez ere COVID-19aren pandemiaren garaian hetsi zuen Frantziako Estatuak mugako bidea, Iriart auzapez izan eta gutira, hain zuzen. 2021ean hetsi zuten lehen aldiz, gero berriz ireki, eta 2023an berriz hetsi, «terrorismoa eta migrazio klandestinoak borrokatzeko»; iaz ireki zuten berriz.
Bestalde, eskola publikoetarako euskarazko murgiltze sistemaren alde borrokatu ziren auzapezen artekoa ere izan zen: errektoretzaren erantzun ofizialik ez izanik ere, Larraineko eskolako ama eskolak euskaraz hasi zuen 2021eko ikasturtea. Ez baitziren berez legez ari, irakasle ohi bat hasi zen klaseak ematen, eta 2022ko irailerako lortu zuten baimen ofiziala. Eredu horretan ari dira geroztik.
Iriart politikan sartu zen gaztetatik, Euskal Herriko Alderdi Sozialistan lehenik. Duela bost urte Mediabaskek egin zion elkarrizketan azaldu zuen alderdi horri bakarrik lotu zitzaiola, eta nahiago zuela libre egon. Pirinio Atlantikoetako Departamenduko hauteskundeetara aurkeztu zuen bere burua 1992an eta 2004an, baita Europako Parlamenturako hauteskundeetara ere.
