45 urteko gizon bat hil da bart gauean Irunen (Gipuzkoa), 02:00ak aldera, Kolon pasealekuan. El Diario Vasco egunkariaren arabera, gizona konorterik gabe geratu da lurrean, norbaitek muturreko bat emanda. Oraingoz ez du inor atxilotu Ertzaintzak.
Larrialdi zerbitzuak iristean, konorterik gabe zegoen, eta ezin izan dute ezer egin haren bizia salbatzeko. Buruan hartutako kolpearen ondorioz zendu da. Gertatutakoa argitzeko, Ertzaintzak ikerketa zabaldu du Irungo Udaltzaingoarekin batera. Gorpua Auzitegi Medikuntzako Euskal Erakundera eraman dute.
Duela hamar egun beste gizon baten hilotza aurkitu zuten Irungo etxe batean, bortizkeria zantzuak zituela.
