Maiatzaren 29az geroztik Donostiako espazio publikoan modu iraunkorrean dago Gipuzkoa Zutik dinamika, baina "hurrengo urratsa" egitea erabaki du: "Kanpaldi iraunkor eta zentralizatutik herrietako dinamika pluraletara zabaltzea".
Dinamikak garrantzitsutzat jo ditu gaur-biharretan egingo dituen batzarrak: gaurkoan, hiru asteon balorazioa egingo dute, eta aurrera begira "indartu edo hobetu beharreko esparruak" identifikatuko dituzte. Bi tailer ere egingo dituzte: "bizi izandako esperientziaren ingurukoa" asteartean, eta desobedientzia zibilaren ingurukoa asteazkenean. Bi tailerrak 17:00etan izango dira, Bulebarrean, eta batzarrak, 19:00etan. Haur jolasak ere prestatu dituzte bi egunetarako, 18:00etatik aurrera.
"Bizitzaren aldeko mugimendu hau Gipuzkoa mailan hedatzen ari dela ikusita, pozik eta harro esan dezakegu hasieratik bilatzen genuen txispa piztea lortu dugula, susperraldia iritsi dela", nabarmendu du dinamikak: "Astelehen gauean 50 lagunek egin dute lo Arrasaten, mankomunitatearen aurrean, erraustegiaren aurka, eta Arrasaten eraiki nahi duten zabortegia ere sinbolo gisa hartuta".
