Karrantzan Jose Maria Martin (EAJ) alkatearen aurkako zentsura mozioa onartu dute gaur Bilduk eta Karrantza Zabala plataformak, euren bozak elkartuz. “Kudeaketa ekonomiko txarra” eta “gardentasun eta lanerako ahalmen eskasak” leporatu dizkiote. Raul Palacio plataformako bozeramailea izango da hemendik aurrera alkate.
Aurreko hauteskundeetan gutxiengoan geratu zen EAJ udaletxean, hamabi urtez bakarrik eta gehiengoan herria kudeatu ondoren. Karrantza Zabala eta Bilduren ustez, jeltzaleek udal kudeaketa bakarrik eramaten jarraitu dute, oposizioarekin elkarrizketa baztertuz. Horrez gain, kudeaketa ekonomiko txarra leporatzen diote, alferrik gastatutako hamabi milioi euro aipatuz.
Hainbat buruzagi jeltzale agertu dira goizean Martini babesa adierazteko. Horien artean, Andoni Ortuzar BBBko presidentea eta Juan Maria Aburto Bizkaiko foru diputatua ziren. EAJko militante batzuk Karrantza Zabala, herriaren nahiaren aurka jartzen zuten kartelekin agertu dira udaletxera.