Klima larrialdia dagoela onartu du Espainiako Gobernuak gaur, ministroen kontseiluaren ondoren egindako adierazpenetan. Hain justu, Pedro Sanchez buru duen gobernuak adierazpen instituzional bat kaleratu du klima larrialdiko egoera aitortzeko, eta neurriak iragarri dituzte datozen 100 egunetarako. Klima aldaketaren legea eztabaidatu nahi dute Espainiako Kongresuan, bertzeak bertze.
Teresa Ribera Trantsizio Ekologikorako ministroak jakinarazi du 30 bat neurri hartuko dituztela larrialdi klimatikoari aurre egiteko, eta horietatik bortz lehendabiziko 100 egunetan hartu nahiko lituzketela erran du. Deskarbonizazio plan bat prestatu nahiko lukete, adibidez, eta Riberak adierazi du klima aldaketari buruzko herri asanblea bat ere sortu nahi duela, emakumeen eta gazteen parte hartzea sustatuta. Eta hori guzia enplegua sortuta eta lurraldeen arteko arrakalak apalduz lortu nahiko lukete. Bertzelako gaiak ere bildu dituzte: adibidez, ekonomia zirkularra eta zaborren bilketa, energia berriztagarriak, garraio publikoa eta neurri fiskalak.
Europako hainbat herrialdek egin dituzte orain arte halako adierazpenak: Irlandak eta Frantziak, erraterako.
